ضحكتها ما بتهزرش

في ناس لما يضحكوا ضحتكهم بتخلي كل اللي حوليهم يحسوا بالخفة و بترسم الابتسامة على وجههم و في ناس ضحتكهم بتخلي اللي حوليهم ينقزو و يصفنو للحظة….او لحظات! انا من النوع الثاني و اللي ما بساعد انو ما بحط اي جهد باني امسك حالي و اعمل اي تعديلات على ضحكتي! و لما تكون ضحكتك هيك بعد عدة صفنات بتجرأ اللي قدامك و بقولك "دينا ايش في؟" او "بابا ليش هيك صايرة ضحكتك" او "عفكرة البنت لما تضحك هيك بتنفهم غلط"! عادي حقكم كلكم انو تستمتعو ببيئة خالية من التلوث الضوضائي و انو ما يتفرجو كل القاعدين عليكم و احنا في مكان عام اذا غضبت السماء عليكم و ضحكت… و انا متأكدة اذا شديت عحالي شوي ممكن يوطى صوتي و تصير الضحكة اقل اذى لنفسيتكم بس اللي ما بتعرفوا انو انا مش من زمان تعلمت اضحك او بالاحرى مش من زمان بضحك من قلبي…

القصة مش من قصص الاكتئاب و التشطيب و الانتحار من على الامبير ستايت (او جسر عبدون عنا بالاردن) القصة انو من كثر ما الحياة سريعة نسيت كيف اعيش…نسيت انو بعد ما اكل و اشرب و ادرس   واعمل اللي فهموني انو واجباتي اتجاه المجتمع و عيلتي و نفسي بيجي آخر النهار… و بآخر النهار بالزبط قبل ما انام بحس بزهق و ملل و اي مرادفات اخرى لهاد المعنى..

المهم بعد جلسلت طويلة على طاولة التفاوض مع حالي قدرت اضحك من قلبي ….. هادي الخاطرة هي لا اعتذار و لا تبرير للضحكة الرخترية..هي دعوة الكم لضحك هستيري و لحياة كلها احساس (الحلو و المر)

 زي اي حدا تاني بعد فقرتين من الحديث عن النفس لازم استحي عحالي و اوجه السؤال الكم مشان توجهو لحالكم بالزبط قبل ما تنامو: انا بضحك كفاية؟

تقهووا

دينا 

picture credit: http://www.worthwhilesmile.com/live-love-laugh-enjoy-life/